Miralago maximalo

2007

Peter Casparis, igl anteriur schef d'ina fatschenta da reclama, e sia dunna, han adempliu a sesez in vegl siemi. Els han cumprau il hotel Miralago ad Aldaco sper Lugano. Els vulan passentar lur temps da pensiun el Tessin. Martin Farbun, il commerciant d'immobiglias, ei vidlunder da sfalsificar ina bilanza e serrar giu in bien quen per l'atgna buorsa. El ei in contemporan propi antipatic che sedeporta da maniera rubiestia e senza scrupels enviers ses concarstgauns. El cugliuna buc mo sia dunna, mobein era siu schef. Lez freda la puorla e scuviera las irregularitads. Tuttina eis ei grav da mussar si lezzas a Farbun. Aschia fa il schef il plan da metter ina trapla per siu collaboratur e tarmetta quel el Miralago.
Pervia d'in donn dad aua ei il hotel da Peter Casparis plitost ina ruina, aschia ch'il portier sco era la dunna da schubergiar san buca nua ch'els dueien metter ils hosps. Aschia schabegia ei naturalmein ch'ina combra vegn affittada duas gadas. Il portier dil Miralago drova tut sia fantasia ed ideas da tener a mistregn la situaziun. La tensiun crescha aunc pli fetg cu sora Filotea arriva. Ella enquera in cussadent dalla claustra dil Sontgissim Cor ed entaupa persuenter Martin Farbun che haveva atgnamein spitgau in'autra dama, ina ord il millieu. Ei vegn aunc meglier cu la consorta da Farbun arriva l'autra damaun. Ella combra dil hotel nua che siu um schai, fa aunc in'autra persuna jastra vacanzas. Ina che Martin Farbun enconuscha buc. Per cumplettar eis ei da menziunar che la casa dil commerciant dubius ei barschada giu en quei temps ch'el ei el Tessin.
En quei toc turbulent han per la fin dils quens aunc daners lavai ina rolla. Buca tuttas persunas che van en ed ora el Miralago ein veramein quei ch'ellas dattan da crer. Da gir eis ei aunc che Patrizia Casty, la feglia dil schef da Martin Farbun, ei en speronza d'in affon ch'ella spetga da siu amitg che vul atgnamein ir en claustra. Ni eis ella en speronza d'in affon da Martin Farbun? La cumedia spèrta e viva ha tuttina in senn: Ella muossa ch'ins sa buca semplamein ir tras la veta senza scrupels e mo sil vial da vargar.

Reschia: 
reschia Marc Seiler scret da Ronny Sunters versiun romontscha Augustin Beeli
Acturs: 
Peter Casparis, hotelier - Meini Cavegn Madleina Casparis, sia dunna - Denise Gabriel Martin Farbun, commerciant d' immobiglias - Marco Camartin Miriam Farbun, sia dunna - Annadora Friberg Hans Casty, immobigliar - Julian Cathomas Silvia Casty, sia dunna - Anja Cathomas Patrizia Casty, feglia - Simona Cathomen Sora Filotea, claustra dil Ss. Cor - Catrina Friberg Martin Stitget, vul ir en claustra - Rudolf Albin Maria Bicicletta, dunna da schubergiar - Fabienne Hürlimann Albert Maresciallo, poriter - Marcel Albin Ursina Dilcrap, dunna da fatschenta - Alejandra Zamuner
Fotografias: